Quero amosar a miña repulsa por algo que sucedeu o pasado 3 de febreiro. Ese día celébrase na parroquia de Sar a festividade de San Brais. Como en anos anteriores, acoden centos de persoas a oír unha misa. Moitas destas persoas desprázanse a pé, pero outras teñen que facelo co seu coche; como non hai moitos aparcamentos, ese día había coches por todo o barrio, e ese é o motivo desta carta. Ía eu pra miña casa e vexo uns axentes multando os coches alí aparcados e o guindastre levándoos.

Cara lles saíu a misa a moitas destas persoas que se atoparon sen coche cando ían buscalo. Pero dáse a casualidade que onde estaban aparcados estes coches moitos domingos e sábados aparcan os coches os seguidores do Obradoiro (que por certo bastantes trastornos nos ocasionan ós que vivimos nesta rúa) e nunca vin un axente nin o guindastre municipal multando e levando os coches alí aparcados.

Pois a lei debérase aplicar a todos os cidadáns por igual, ou acaso hai cidadáns de primeira e cidadáns de segunda?