Inicio
O grupo galego Fuxan os Ventos presentou onte en Santiago a saída ó mercado do seu último disco Terra de Soños, un CD-DVD que recolle os seus temas clásicos máis coñecidos para evidenciar "a boa situación da música feita en Galicia".
Así o explicou onte Tareixa Novo, integrante do grupo, na presentación do disco que rememora os temas máis coñecidos da formación, un total de 20, en compañía dun DVD no que se recolle unha das dúas actuacións que Fuxan vos Ventos ofreceu o mes de outubro do 2008 en Compostela tras dúas décadas sen subir ós escenarios.
Terra de Soños, que saíu á venda onte en tendas de toda España, quioscos galegos e internacionalmente vía Internet, está composto por temas como Alalá da Pena, Canto de seitura, O carro ou A Carolina. Así mesmo, o DVD inclúe oito temas máis, como o popular Sementeira, interpretados en compañía de artistas "na vangarda da música galega" como Guadi Galego, Uxía ou Mercedes Peón.
En conxunto, o director da discográfica Boa Music, Fernando Luaces, asegurou que a obra constitúe un "espectáculo emocionante", mostra do traballo realizado por Fuxan dos Ventos de "recuperación do patrimonio musical galego". Tras 20 anos sen concertos en directo e con participacións puntuais en recitais, unha "época de silencio", Tareixa Novo indicou que o grupo "tiña a sensación de que lle quedaban cousas por facer" e lembrou a vixencia dun grupo que "o que fixeron foi crear folk" e convertelo "en himnos xeracionais".
