O engado cósmico de Berrogüetto

Isaac Palacín, esda., Guillerme Fernández, Quim Farinha, Xabier Díaz, Anxo Pintos, Quico Comesaña e Santi Cribeiro son Berrogüetto

As súas rentrées marcan un risco de cor no calendario musical galego. Desta volta o 7 abril é a data escollida polo grupo Berrogüetto para a presentación do seu novo disco, Kosmogonías, o quinto traballo dunha formación que semella permanecer nun estado perpetuo de fervenza creativa. A posta en común dos seus integrantes, a innovación e a experimentación volven estar presentes nun disco que incorpora a voz de Xabier Díaz no canto da de Guadi Galego.

Composto por once temas, Kosmogonías é, segundo os integrantes do grupo, "unha chamada chea de optimismo cara a consecución dun sistema de organización máis xusto". A inspiración provén, sinalan, daquelas "vontades colectivas ou individuais que cos seus xestos e actitudes traballan para mellorar o seu contorno".

Ese canto ao esforzo cooperativo estaba xa presente desde o seu traballo inicial -Navicularia (1996)-, unha estrea á que seguiron outros tres volumes: Viaxe por Urticaria (1999), Hepta (2001) -polo que foron nomeados en 2002 aos Premios Grammy latino na categoría de Mellor álbum folk- e 10.0 (2006).

Cun pé na tradición musical da que son debedores e un tratamento desprexuiciado das sonoridades, dos timbres e da diversidade rítmica, Berrogüetto logrou erguer, ao longo destes anos, un selo singular que identifica todos e cada un dos seus discos, abeirados á conceptualidade e atravesados pola vontade de facturar un produto cultural, froito dunha rigorosa e consecuente percepción do feito creativo nun contexto como o galego.

En Kosmogonías, Berrogüetto recunca nas colaboracións literarias. Manuel Rivas é o autor da letra da canción Alalá da noite, tirada do seu poema Alalá, incluído no volume A desaparición da neve (Alfaguara, 2009), e Rosa Aneiros asina o texto que acompaña o libreto do disco. "Berrogüetto -di Aneiros-, corpo aberto en sete latexares, trasládanos esa infinita sinfonía, u­nha voz que xorde de tan dentro que mesmo deo porque é a nosa propia voz feita música. Eles fannos soñar que outra música, outra orde cósmica é posible". A partir da publicación de Kosmogonías en abril, Berrogüetto iniciará unha xeira de concertos que partirá, o venres 9 de abril, do Pazo da Cultura de Pontevedra, unha das prazas fortes do grupo. O xoves 15 de abril será o Teatro García Barbón de Vigo o que acolla os novos temas de grupo, tres días antes da actuación, o 18 de abril, no Teatro Rosalía de Castro da Coruña.