Funcións completas en Madrid para 'A ópera dos tres reás'

Muriel Sánchez, Quico Cadaval e Luís Tosar, na presentación da obra en Madrid FOTO: Efe

O Centro Dramático Galego (CDG) concluíu onte á noite as dúas semanas de exhibición d'A ópera dos tres reás no Teatro Fernán Gómez de Madrid, onde esta versión do clásico de Bertolt Brecht e Kurt Weill obtivo un gran éxito de público, co aforo completo en todas as representacións. Arredor de 4.500 espectadores asistiron no céntrico escenario madrileño ás nove funcións deste espectáculo musical, que a compañía pública de teatro produciu co patrocinio de Novacaixagalicia e Fundación Cidade da Cultura, no marco da celebración do Ano da Música.

A expectación xerada pola presentación na carteleira madrileña da proposta escénica do director Quico Cadaval, que conta con Diego García Rodríguez na dirección musical e cun amplo elenco artístico encabezado polo actor Luis Tosar, levou ao Teatro Fernán Gómez a ampliar o aforo inicial para intentar satisfacer a gran demanda por parte dun público que esgotou todas as entradas á venda.

Segundo explica o conselleiro de Cultura e Turismo, Roberto Varela, este interese reflectiuse, así mesmo, no gran número de medios de comunicación especializados e xerais que dedicaron unha cobertura especial a este espectáculo, de "factura integramente galega". Para esta xira estatal, traducíronse ao castelán os textos falados, mentres que as cancións se manteñen en galego con sobretítulos.

Esta versión do clásico de Bertolt Brecht e Kurt Weill sitúase entre as meirandes producións enfrontadas ata o momento polo CDG, cun total de 20 artistas en escena interpretando en directo música e cancións. Xunto con Luis Tosar César Goldi, Alba Messa, Víctor Mosqueira, Mónica de Nut, Marcos Orsi, Marta Pazos, Fran Pérez Narf, Muriel Sánchez, Begoña Santalices e Sergio Zearreta integran o elenco actoral.

Ao seu carón, unha banda de oito músicos executa en directo a partitura deste clásico do século XX.