Inicio
 |
| APERTURA Juan Carlos F. Fasero, esquerda, Francisco López, Natalia Granell e Pilar Corredoira, onte na Casa da Parra de Santiago FOTO: Ramón Escuredo |
A pintura surrealista instalouse onte na Casa da Parra de Santiago, encarnada no nome do pintor británico Philip West. Metamorfose da imaxe poética é o título dunha mostraque ofrece un percorrido pola última etapa artística e vital do artista. Organizada pola Agadic (Axencia Galega das Industrias Culturais) da Consellería de Cultura e Turismo, en colaboración coa Fundación Granell, reúne un total de 22 pinturas e debuxos procedentes da importante colección que o propio artista, amigo de Eugenio Granell, legou á devandita Fundación.
O director da Agadic, Juan Carlos F. Fasero, participou na presentación da mostra que, segundo subliñou, pon a disposición dos composteláns e dos numerosos visitantes que se achegarán estes dous meses á cidade unha "excelente oportunidade de entrar en contacto ou de afondar na suxerente obra de Philip West" (York, 1949-Zaragoza, 1997), que nos seus últimos anos experimentou unha serie de transformacións que poden ser entendidas a modo de resumo das súas experiencias plásticas anteriores.
Fasero estivo acompañado na inauguración polo director xeral do Libro, Bibliotecas e Arquivos, Francisco López Rodríguez, e pola directora da Fundación Granell. López destacou que a obra de Philip West se centra "no trípode surrealista de liberdade, amor e poesía" e salientou que cada cadro deste autor "é en si mesmo una metáfora poética". O director xeral do Libro tamén quixo facer referencia á faceta de West como "editor de fermosas edicións de poetas" e ao seu papel como escritor en prestixiosas revistas internacionais.
A mostra, comisariada por Pilar Corredoira, exhibe 16 pinturas e seis debuxos que Philip West realiza en Zaragoza entre 1983 e 1996, sintetizando así o proceso de traballo que o artista desenvolve na última fase da súa vida. Nese período, a súa obra caracterízase pola simplificación das imaxes, os espazos labirínticos, a fragmentación de superficies e as viñetas xustapostas, explicando dun xeito poético a contraposición de ideas. A cor plana, unha iconografía máis simple e a destacada presenza do debuxo engrandecen a idea de West en torno á utilización da alegoría histórica.
De acceso gratuíto, o horario de apertura da mostra é de martes a sábado de 11.00 a 14.00 e de 16.30 a 20.00 horas e os domingos de 11.00 a 14.00 h. Os luns e festivos a mostra permanecerá pechada.
