O Museo de Pontevedra acollerá desde hoxe a mostra 'Novos Valores'

Santiago. Un ano máis o Museo de Pontevedra acolle a exposición que mostra as obras seleccionadas no certame Novos Valores. O xoves 28 de xullo, ás 20:00 horas celebrarase a inauguración no Sexto Edificio.

Ata o 18 de setembro de 2011, no horario habitual de exposicións temporais, exhibiranse corenta das 253 pezas presentadas, entre as que se atopan as que obtiveron as bolsas correspondentes.

Este ano o xurado, presidido por José Juan Durán Hermida, e do que foron vogais, José Carlos Valle Pérez; Carlos Rosón Gasalla; Carlos García Suárez Otero; Antón Sobral Iglesias; Ramón Rozas; Mercedes Costas Fernández; e Antonio Santos Guerra, como secretario, premiou as seguintes obras e artistas: o vigués Hugo Aldatz Alonso, pola peza Empty pools, e a baionesa Lula Goce, por Topografías, na modalidade de escultura. Na modalidade de escultura resultou gañadora a obra Frontiere á ne pas franchir, de Verónica Vicente. Antonio Lorenzo Guisado, con Karnaq, e Fernando Lafuente Lestón, con Librería, foron recoñecidos na modalidade de pintura. Ademais Marta González Fortes, coa obra S/T, recibiu o premio José Fernández López de pintura.