Inicio
Santiago Onte á mañá, o delegado de Cultura e Turismo da Deputación de Lugo, Mario Outeiro, inaugurou xunto á directora do Museo de Lugo, Aurelia Balseiro, o comisario da intervención, Rafael Lens, e ao artista plástico, Jorge Perianes, a intervención realizada por este propio autor sobre tres espazos do Museo de Lugo.
Segundo Outeiro, "con Diálogos inícianse unha serie de intervencións de artistas que propoñen relacións entre a colección permanente do Museo de Lugo e a creación contemporánea". Estas propostas realizadas por artistas actuais, na pasada edición tratárase do traballo de Iván Prieto, achegan anovadoras visións sobre as coleccións presentando os bens culturais como algo vivo e dinámico.
O propio artista, Jorge Perianes, xunto coa directora do Museo de Lugo, Aurelia Balseiro, afondaron na concepción do proxecto expositivo e indicaron que as intervencións de Jorge Perianes abranguen tres espazos do museo, dous deles son de lugares tradicionalmente expositivos, a sala dos reloxos e unha sala de pintura, mentres que o outro é un espazo da última ampliación do Museo Provincial de Lugo, unha fiestra.
