 |
| Miguel Taín (esquerda) con Julio Casal e Fernando Vázquez FOTO: Antonio Hernández |
A partir do próximo ano poderá haber peregrinos cibernéticos, xa que un videoxogo recreará nun "universo virtual" o Camiño e a cidade de Santiago de Compostela do século XII. O lanzamento da primeira fase do proxecto, que contará cun orzamento de 3,5 millóns de euros, coincidirá coa celebración do Xacobeo e estará operativo en xullo do 2010. Un consorcio de empresas formado pola galega Ficción Producións, Imatia, One Click e Planet media é o encargado deste proxecto virtual, denominado O Camiño, que contou coa colaboración das universidades de Vigo e Santiago de Compostela.
Este metauniverso -universo virtual en 3 dimensións- reconstruirá a cidade de Compostela e a Ruta Xacobea no ano 1117, data das revoltas dos contra o bispo Xelmírez e a reina Urraca, unha época "clave" na historia de Galicia.
Segundo anunciaron os representantes do consorcio de empresas, esta iniciativa constituirá o comezo dun "proxecto máis amplo": unha "plataforma tecnolóxica de desenvolvemento de futuros metauniversos".
A "nova" iniciativa mostrará tridimensionalmente aos usuarios a recreación dos elementos arquitectónicos e sociolóxicos máis representativos da época, entre os que destacan a Catedral de Santiago, aínda en construción, o palacio de Gelmírez na Praza da Quintana e caseríos e tendas do século XII, para o que, por outra banda, foi necesario un "exercicio de imaxinación".
A plataforma vitual tamén contou co asesoramento do profesor Miguel Taín, do departamento de Xeografía e Historia da USC, para dotar o proxecto de "rigor cultural e histórico", tal e como manifestaron os seus responsables.
Desta forma, os participantes deste "metauniverso" poderán meterse na pel de diferentes personaxes ou "avatares" -representación gráfica coa que os usuarios xogan e se identifican-, como soldados ou cidadáns deseñados "fielmente" a través dunha tarefa de documentación na que se consultou desde coleccións medievais privadas, ata códices, "cantigas" ou relevos da época.
O asesoramento das universidades facilitou o deseño dos contidos didácticos, como a "reprodución de diálogos, un glosario de termos técnicos ou fichas cos datos máis significativos" dos distintos monumentos presentes na plataforma. O videoxogo terá un aspecto educativo, xa que, segundo Taín Guzmán, introducirá os mozos "no mundo da Historia de forma amena e actual" coa finalidade de que "coñezan e valoren os momentos históricos narrados en primeira persoa".
Na presentación de O Camiño, os representantes do consorcio creador sinalaron que se trata dun "proxecto moi ambicioso" e que xestionará unha "gran cantidade de contidos", para o foi necesario o "traballo multidisciplinar" de máis de 80 persoas que, como informaron, "posiblemente se multiplique".
RSS