Cursos fluviais de Galicia: o Anllóns

Nace no Monte Pedrouzo, entre os concellos de A Laracha e Cerceda, e desemboca ó Océano Atlántico a través da ría de Corme e Laxe, despois de percorrer os concellos de A Laracha, Carballo, Coristanco, Cabana e Ponteceso. O seu nome provén da palabra “anguloso”, debido á sinuosidade do seu percorrido, principalmente no seu curso alto. Nos últimos quilómetros do seu curso, antes de desembocar no mar, o río forma un fermoso estuario e unha zona de rápidos que aceleran as súas augas. O Grande, o Acheiro, o Rosende ou o Anós son algúns doas seus afluentes, todos eles pola súa marxe esquerda ó discorrer río enparalelo ó litoral.

O seu curso medio e baixo está declarado Zona de Especial Protección dos Valores Naturais (ZEPVN) e o seu estuario inclúese no Lugar de Importancia Comunitaria (LIC) Costa da Morte, ambos os dous pola súa significativa importancia natural e ecolóxica pola gran pluralidade de hábitats e especies (tanto vexetais como animais) que os conforman.

O Anllóns conta cunha importante variedade piscícola entre a que destacan especies como o reo, a troita, a troita arcoíris, a anguía, a boga a solla e, de forma esporádica, a lamprea. Os coutos deste curso fluvial, todos eles de troita, son os de Carballo, Verdes e Laracha, este último creado máis recentemente. Os principais riscos ambientais son as verteduras de augas residuais ó seu curso, provocando graves consecuencias para a súa biodiversidade e, en especial, para a supervivencia da fauna piscícola.

Ver: as áreas recreativas creadas a carón do río Anllóns ó longo de todo o seu percorrido son unha das nosas principais recomendacións; a de Verdes, no concello de Coristanco, é a máis salientable pola súa beleza paisaxística, pero tamén cabe destacar outras como a de Gabenlle, en A Laracha, onde tamén vale a pena visitar o seu paseo fluvial. Ademais, esta zona ten unha grande importancia en canto a pratimonio arqueolóxico e cultural con recoñecidos xacementos megalíticos e castrexos como o Dolmen de Pedra Moura, en Carballo, ou o Dolmen de Dombate e a Cidá ou Castro de Borneiro, no concello de Cabana. A costa e as praias do concello de Carballo ou Malpica, e os cercanos acantilados de Corme, onde destaca a Punta do Roncudo, son outros dos lugares de maior relevancia da comarca.

Chegar: as estradas provinciais AC-413, ata Carballo, e a AC-552, ata A Laracha, son as mellores opcións para achegarnos ata a conca do Anllóns e dende estes puntos dirixirnos a diferentes tramos do seu curso.

Comer: os peixes e produtos de río e de mar son o máximo expoñente da cociña da comarca de Bergantiños, destacando os percebes do Roncudo ou as troitas. Outros manxares como as patacas de Coristanco ou o pan de Carballo, xunto con postres como as filloas e as orellas, típicos do Entroido, completan a carta gastronómica da zona.

Aloxamento: máis dunha decena de casas de turismo rural conforman a mellor opción para aloxarse na comarca que atravesa o río Anllóns, á vez que nos permiten chegar con facilidade a todos os puntos de interese.